மொழிபெயர்ப்பின் மூலக் கட்டுரையை இங்கே காணலாம்.

கடந்த திங்கட்கிழமை, ஈரானிய துறைமுகங்களுக்குள் நுழையும் அல்லது அங்கிருந்து வெளியேறும் அனைத்து கப்பல்களையும் தடுக்கத் தொடங்கியுள்ளதாக அமெரிக்க இராணுவம் அறிவித்துள்ளது. இது ஈரானுக்கு எதிரான அமெரிக்கப் போரின் ஒரு பெரிய விரிவாக்கத்தை குறிப்பதோடு, ஆறு நாட்களுக்கு முன்னதாக பாகிஸ்தான் பிரதமர் ஷேபாஸ் ஷெரீப்பால் அறிவிக்கப்பட்ட போர்நிறுத்தத்தை அமெரிக்கா நடைமுறையில் இரத்து செய்துள்ளதையும் குறிக்கிறது.

அமெரிக்க ஜனாதிபதி டொனால்ட் ட்ரம்ப் ஞாயிற்றுக்கிழமை அன்று ட்ரூத் சமூக வலைத் தளத்தில், “ஹோர்முஸ் நீரிணைக்குள் நுழைய முயலும் அல்லது அங்கிருந்து வெளியேற முயலும் எந்தவொரு மற்றும் அனைத்துக் கப்பல்களையும் முற்றுகையிடும் செயல்முறையை கடற்படை தொடங்கும்” என்று அறிவித்தார். சனிக்கிழமையன்று இரண்டு வழிகாட்டப்பட்ட ஏவுகணை நாசகாரி கப்பல்கள் நீரிணைக்குள் நுழைந்தன. இந்த முற்றுகையை அமல்படுத்துவதற்காக தற்போது 15 அமெரிக்கப் போர்க்கப்பல்கள் அப்பிராந்தியத்தில் நிலைநிறுத்தப்பட்டுள்ளதாக வோல் ஸ்ட்ரீட் ஜேர்னல் செய்தி வெளியிட்டுள்ளது.

இந்த முற்றுகையானது ஒரு போர் நடவடிக்கையாகும் மற்றும் சர்வதேசக் கடல் கொள்ளைக்கு நிகரான செயலாகும். ஈரானுக்கு எதிராகவும், ஒட்டுமொத்த உலகத் தொழிலாள வர்க்கத்திற்கு எதிராகவும் தொடுக்கப்பட்டுள்ள இந்தத் ஒழுக்கமற்ற குற்றவியல் நடவடிக்கையை உலக சோசலிச வலைத் தளம் வன்மையாகக் கண்டிக்கிறது. விண்ணைத் தொடும் எரிசக்தி செலவுகள், உணவுத் தட்டுப்பாடு மற்றும் எப்போதும் நிலவிக்கொண்டிருக்கும் ஒரு பரந்த இராணுவ மோதலின் அபாயம் ஆகியவற்றின் மூலம் உலகத் தொழிலாள வர்க்கமே இதற்கான விலையைக் கொடுக்க நேரிடும்.

ட்ரம்ப்பின் சொந்த வார்த்தைகளிலேயே சொல்வதானால், இந்த போர்நிறுத்தமானது போரின் அடுத்த கட்டத்திற்காக ஆயுதங்களை “மீண்டும் நிரப்புவதற்கான” ஒரு வாய்ப்பாக மட்டுமே நிரூபிக்கப்பட்டுள்ளது. மத்திய கிழக்கில் ட்ரம்ப் அறிவித்த ஒவ்வொரு போர் நிறுத்தமும் —ஜனவரி 2025-ல் காஸாவில் தொடங்கி, ஜூன் 2025-ல் ஈரான், இந்த ஏப்ரல் 7 அன்று ஈரான் போர் நிறுத்தம், அதைத் தொடர்ந்து சில மணி நேரங்களில் மத்திய பெய்ரூட் மீது இஸ்ரேல் நடத்திய தாக்குதலில் 250-க்கும் மேற்பட்டோர் கொல்லப்பட்டது வரை — அடுத்த தாக்குதலுக்குத் தங்களைத் தயார்படுத்திக் கொள்வதற்கான ஒரு இடைநிறுத்தமாகவே இருந்து வந்துள்ளது.

ஹோர்முஸ் நீரிணையின் மீதான கட்டுப்பாடு —மற்றும் அதன் மூலம் ஈரானின் எண்ணெய் உற்பத்தி மற்றும் விநியோகம் உட்பட பாரசீக வளைகுடா பிராந்தியம் முழுவதையும் தன் வசப்படுத்துவது— என்பதே ஆரம்பத்திலிருந்து இந்தப் போரின் மைய மூலோபாய இலக்காக இருந்து வருகிறது.

போர் தொடங்கியதிலிருந்து, இந்த நீரிணை வழியாக நடைபெறும் கப்பல் போக்குவரத்து முற்றிலும் முடங்கியுள்ளது. போர் தொடங்குவதற்கு முன்பு இருந்த நிலையை விட, நீரிணை வழியான போக்குவரத்தின் அளவு 90 சதவீதத்திற்கும் மேலாக குறைந்துள்ளது. எஞ்சியிருக்கும் போக்குவரத்தில், ஈரானின் மறைமுகக் கப்பல் குழுவும், சீனாவிற்கு கச்சா எண்ணெயை ஏற்றிச் செல்லும் கிரேக்க ஆதரவு பெற்ற எண்ணெய்க் கப்பல்களுமே ஆதிக்கம் செலுத்துகின்றன. ஈரானின் மிகப்பெரிய வாடிக்கையாளரான சீனா, அதன் எண்ணெய் ஏற்றுமதியில் 80 முதல் 90 சதவீதத்தை எடுத்துக்கொள்கிறது. ஈரான், தனது நட்பு வர்த்தகப் பங்காளிகளுக்கு, குறிப்பாக சீனாவிற்குச் செல்லும் கப்பல்களுக்குத் தொடர்ந்து அனுமதி அளித்து வருகிறது.

தற்போது ஈரானியத் துறைமுகத்தை அடைவதற்காக இப்போது நீரிணையை கடக்க முயற்சிக்கும் எந்தவொரு கப்பலும் அமெரிக்காவின் அனுமதியின்றியே செல்கிறது. இது ஈரானுடன் வர்த்தகம் செய்யும் எந்தவொரு நாட்டின் கப்பல்கள் மீதும் நேரடித் தாக்குதல் நடத்துவதற்கான சாத்தியத்தைத் திறந்து விடுகிறது. சீனப் பாதுகாப்பு அமைச்சர் டோங் ஜுன் திங்களன்று கூறுகையில்: “எங்கள் கப்பல்கள் ஹோர்முஸ் நீரிணையின் நீர்ப்பரப்பிற்குள் வந்து செல்கின்றன. ஈரானுடன் எங்களுக்கு வர்த்தக மற்றும் எரிசக்தி ஒப்பந்தங்கள் உள்ளன. நாங்கள் அவற்றை மதித்து நடப்போம், மற்றவர்கள் எங்கள் விவகாரங்களில் தலையிட மாட்டார்கள் என்று எதிர்பார்க்கிறோம்” என்றார்.

ஹோர்முஸ் நீரிணை முற்றுகையானது, நடைமுறையில் ஈரானுக்கு எதிராக எவ்வளவு தூரம் ஒரு பொருளாதாரப் போராக இருக்கிறதோ, அதே அளவிற்கு சீனாவிற்கு எதிராகவும் இருக்கிறது. சீனாவின் எண்ணெயில் கிட்டத்தட்ட பாதியும், அதன் திரவமாக்கப்பட்ட இயற்கை எரிவாயுவில் (LNG) மூன்றில் ஒரு பங்குக்கும் மேலாகவும் இந்த ஹோர்முஸ் நீரிணை வழியாகவே செல்கின்றன. இந்த முற்றுகையின் மூலம், அமெரிக்கா தனது முதன்மையான போட்டியாளரான சீனாவின் எரிசக்தி விநியோகத்தின் மீதும், அதே விநியோகத்தை நம்பியிருக்கும் தனது “நட்பு நாடுகளான” ஜப்பான், தென் கொரியா மற்றும் ஐரோப்பிய ஒன்றிய நாடுகளின் மீதும் தனது அதிகாரத்தைச் செலுத்துகிறது.

கடந்த திங்கட்கிழமை நடைபெற்ற செய்தியாளர் சந்திப்பில் அமெரிக்க இராணுவ மூலோபாயவாதிகளின் சிந்தனையை ட்ரம்ப் சூசகமாக தெரிவித்தார்: “எமக்கு இந்த வர்த்தகம் தேவையில்லை. எம்மிடம் எமக்குப் போதுமானதை விட அதிகமான எண்ணெய் மற்றும் எரிவாயு உள்ளது... எனவே எமக்கு இது தேவையில்லை, ஆனால் உலகிற்கு இது தேவை. நாம் இப்போது பேசிக்கொண்டிருக்கும் இந்தத் தருணத்தில் கூட, பல கப்பல்கள் எமது நாட்டிலிருந்து எரிசக்தியை ஏற்றிச் செல்வதற்காக அமெரிக்காவை நோக்கி வந்து கொண்டிருக்கின்றன” என்றார்.

இந்த முற்றுகையானது உலகெங்கிலும் உள்ள மூலோபாய முக்கியத்துவம் வாய்ந்த வழிகளை - ஹோர்முஸ் நீரிணை, பனாமா கால்வாய், கிரீன்லாந்து நோக்கிய வழிகள் - கைப்பற்றுவதற்கான ஒரு பரந்த அமெரிக்க நடவடிக்கையின் ஒரு பகுதியாக உள்ளது. நீண்டகாலப் பொருளாதாரச் வீழ்ச்சியை சந்தித்து வரும் அமெரிக்க ஏகாதிபத்தியம், உலகளாவிய வர்த்தகப் பாதைகளின் மீது இராணுவ மேலாதிக்கத்தைச் செலுத்துவதன் மூலமும், உலகின் நீர்வழிகள் மற்றும் மூலப்பொருட்களைத் தனதாக்கிக் கொள்வதன் மூலமும், எல்லாவற்றிற்கும் மேலாக தனது எதிரியான சீனாவிற்கு அவற்றை மறுப்பதன் மூலமும் அந்த வீழ்ச்சியை ஈடுகட்ட முயற்சிக்கிறது.

2025 டிசம்பரில், வெனிசுவேலா கடற்பகுதிக்கு அப்பால் சீனாவை நோக்கிச் சென்ற 1.8 மில்லியன் பேரல் கச்சா எண்ணெய் ஏற்றிய எண்ணெய்தாங்கி கப்பலை அமெரிக்கப் படைகள் கைப்பற்றின. ஹோர்முஸ் நீரிணை முற்றுகையானது அந்த முன்னுதாரணத்தை பாரசீக வளைகுடாவிற்கு விரிவுபடுத்துகிறது. சீனாவிற்குச் செல்லும் கப்பல்களை அமெரிக்கப் போர்க் கப்பல்கள் தடுக்க முயன்றால், அது சீனாவுடன் நேரடி இராணுவ மோதலுக்கான அபாயத்தை உருவாக்கும்.

ஈரானுக்கு எதிரான அமெரிக்க ஏகாதிபத்தியத்தின் குற்றவியல் போரினால் ஏற்பட்டுள்ள பொருளாதார விளைவுகள் ஏற்கனவே பேரழிவை ஏற்படுத்தியுள்ளன. இந்த முற்றுகைக்கு முன்பே, ஹோர்முஸ் நீரிணை வழியாக நடைபெறும் போக்குவரத்து கணிசமாகக் குறைக்கப்பட்டிருந்தது. இதனை 1979-ஆம் ஆண்டையும் விஞ்சிய, வரலாற்றிலேயே மிக மோசமான எண்ணெய் நெருக்கடி என்று சர்வதேச எரிசக்தி முகமை குறிப்பிட்டது. கச்சா எண்ணெய் ஒரு பேரல் 100 டாலர்களுக்கும் மேல் உயர்ந்துள்ளது, அமெரிக்காவில் ஒரு கேலன் பெட்ரோல் 4.13 டாலராக உள்ளது, மேலும் 600 க்கும் மேற்பட்ட கப்பல்கள் வளைகுடாவில் சிக்கியுள்ளன. அமெரிக்கா பொருளாதார மந்தநிலையைச் சந்திப்பதற்கான வாய்ப்பு 30 சதவீதமாக உயர்ந்துள்ளதாக கோல்ட்மேன் சாக்ஸ் (Goldman Sachs) தெரிவித்துள்ளது.

உலகளாவிய உர விநியோகத்தில் மூன்றில் ஒரு பங்கு பொதுவாக இந்த நீரிணை வழியாகவே செல்கிறது. இந்தப் போர் உடனடி வர்த்தகத்தை மட்டும் சீர்குலைக்கவில்லை, மாறாக அடுத்த பருவத்தின் பயிர் விளைச்சலிலும் கடுமையான பாதிப்பை ஏற்படுத்தும் — ஆப்பிரிக்கா, தெற்காசியா மற்றும் இலத்தீன் அமெரிக்கா முழுவதும் அறுவடை குறையும், மேலும் வளைகுடா விவகாரத்தில் நேரடித் தொடர்பு இல்லாத நாடுகளிலும் உணவு விலை உயர்வு பாதிப்பை ஏற்படுத்தும். பல கோடி மக்கள் உணவுப் பாதுகாப்பின்மையை எதிர்கொள்கின்றனர், மேலும் பல கோடி மக்கள் உயிரிழக்க நேரிடலாம். உலகளாவிய பஞ்சம் என்பது ஒரு உண்மையான சாத்தியக்கூறாக உள்ளது.

உலகை மேலாதிக்கம் செலுத்தும் வாஷிங்டனின் திட்டத்திற்குள், இந்தப் போரின் உண்மையான செயல்பாடுகள் பெருகிவரும் விரக்தி மற்றும் தற்காலிகமான முடிவுகளால் வகைப்படுத்தப்படுகின்றன. பிப்ரவரி 28 அன்று, அமெரிக்கா போரைத் தொடங்கி, ஈரானின் உச்ச தலைவர் அலி கொமேனி மற்றும் டசின் கணக்கான மூத்த ஈரானிய அதிகாரிகளைக் கொன்றது. ஈரானியர்கள், அவர்களது அரசாங்கத்திற்கு எதிராக கிளர்ந்தெழுமாறு ட்ரம்ப் அழைப்பு விடுத்தார், ஆனால் அவர்கள் அவ்வாறு செய்யவில்லை. அதைத் தொடர்ந்து நடத்தப்பட்ட குண்டுவீச்சுத் தாக்குதல்கள் ஈரானின் தொலைத்தொடர்புச் சேவைகளை அழித்தன மற்றும் அதன் நகரங்களின் பல பகுதிகளைத் தரைமட்டமாக்கின, ஆனாலும் ஈரான் சரணடையவில்லை. மார்ச் மாதம் முழுவதும் ஈரானியத் தலைவர்கள் தொடர்ந்து படுகொலை செய்யப்பட்டும் அந்த அரசாங்கம் வீழவில்லை. இப்போது அதன் அடுத்த கட்டமாக இந்த முற்றுகை வந்துள்ளது.

அமெரிக்கப் போர்க்கப்பல்கள் இப்போது 21 மைல் அகலமே கொண்ட குறுகிய நீர்வழிப்பாதைக்குள் மிக நெருக்கமாக இயங்கி வருகின்றன. இதன் இருபுறமும் ஈரானிய ஏவுகணைத் தளங்கள், கடற்கரைப் பாதுகாப்புப் படைகள் மற்றும் ஆயிரக்கணக்கான கண்ணிவெடிகள் உள்ளன. முற்றுகையை நெருங்கும் எந்தவொரு ஈரானியக் கப்பலும் “உடனடியாக அழிக்கப்படும்” என்று ட்ரம்ப் திங்களன்று தெரிவித்தார்.

ஒரு போர்க்கப்பலை இழப்பதோ அல்லது ஒரு பெரிய அளவிலான உயிர்ச்சேதமோ ஏற்பட்டால், அது ஈரானின் 90 சதவீத எண்ணெய் ஏற்றுமதி நடைபெறும் கார்க் தீவை கைப்பற்றுவது உள்ளிட்ட தரைவழி ஆக்கிரமிப்பிற்கான கோரிக்கைகளை அமெரிக்க அரசியல் வட்டாரத்தில் தீவிரப்படுத்தும். 82-வது வான்வழிப் பிரிவின் துருப்புக்களும் கடற்படையினர்களும் ஏற்கனவே இந்தப் பிராந்தியத்தில் நிலைகொண்டுள்ளனர். மேலும் 50,000-க்கும் மேற்பட்ட அமெரிக்கப் படையினர்கள் இந்த போர்முனையில் உள்ளனர். பிப்ரவரி 28 முதல் இதுவரை 13 அமெரிக்க சிப்பாய்கள் கொல்லப்பட்டுள்ளனர்.

ட்ரம்ப் நிர்வாகம் அதிர்ச்சியூட்டும் பொறுப்பற்ற தன்மையுடன் செயல்பட்டு வருகிறது. அமெரிக்கா ஈரானின் எண்ணெயைக் கைப்பற்றும் என்று அவர் வெளிப்படையாகக் கூறியுள்ளார் —இது கடந்த கால நிர்வாகங்கள் பொருளாதாரத் தடைகள் மற்றும் சர்வதேச சட்டங்கள் என்ற மொழியில் மறைத்து வைத்திருந்த கொள்ளை எண்ணத்தை இவர் பகிரங்கமாக அறிவித்துள்ளார். பாதாள உலகக் குற்றவாளிகளின் முறைகள் இப்போது உத்தியோகபூர்வ அதிகாரப்பூர்வ அரசு கொள்கையாக மாறியுள்ளன.

வாஷிங்டனின் அரசியல் வட்டாரம் கொள்கை ரீதியாக இதற்கு எந்த எதிர்ப்பும் தெரிவிக்கவில்லை. நியூ யோர்க் டைம்ஸ் பத்திரிகையானது, ட்ரம்பின் நடத்தையை “வெளிப்படையான திறமையின்மை” என்று விமர்சித்து, “காங்கிரஸையும் அமெரிக்காவின் நட்பு நாடுகளையும் இதில் ஈடுபடுத்துமாறு” அவரை வலியுறுத்தியுள்ளது — இது போரின் அடுத்த கட்டத்தை நடத்துவதற்கு அமெரிக்காவின் இரு கட்சிகளின் ஒத்துழைப்பைக் கோருவதாகும். வோல் ஸ்ட்ரீட் ஜேர்னல் ட்ரம்பின் அறிவிப்பை முதிர்ச்சியற்றது என்று அழைத்ததோடு, “வேலை இன்னும் முடியவில்லை” என்றும் எச்சரித்தது.

ஜனநாயகக் கட்சியின் செனட்டர் டிம் கெய்ன் ஞாயிற்றுக்கிழமை ABC ஊடகத்திடம் கூறுகையில், ஈரான் ஒரு “பிராந்திய அச்சுறுத்தல்” என்றும், “ஈரான் அணு ஆயுதத்தைப் பெறாமல் இருப்பதை நாம் உறுதி செய்ய வேண்டும்” என்றும் தெரிவித்தார். ஒரு வாரத்திற்கு முன்பு ட்ரம்ப் “போர்நிறுத்தத்தை” அறிவித்தபோது, ஹோர்முஸ் நீரிணையின் கட்டுப்பாட்டை ஈரானின் கைகளிலேயே விட்டுவிட்டதாகக் கூறி ஜனநாயகக் கட்சியினர் அவரை விமர்சிக்க விரைந்தனர். ஜனநாயகக் கட்சியினர் இந்தப் போரின் மூலோபாய இலக்குகளை ஏற்றுக்கொள்கிறார்கள், ஆனால் அதன் செயல்பாட்டை மட்டுமே எதிர்க்கிறார்கள்.

அமெரிக்க அரசியல் ஸ்தாபனத்தின் ஒவ்வொரு பிரிவும் இந்தப் போரை ஆதரிக்கிறது என்றால், இதற்கான எதிர்ப்பு அந்த ஸ்தாபனத்திற்கு வெளியிலிருந்தே வர வேண்டும். தொழிலாள வர்க்கம் தனது சொந்த சுயாதீனமான அரசியல் அணிதிரட்டல் மூலம் இந்த முற்றுகையையும் ஒட்டுமொத்தப் போரையும் எதிர்க்க வேண்டும். உழைக்கும் மக்கள் வாழ்வதற்கு நம்பியிருக்கும் சமூக நலத்திட்டங்கள் மீதான வரலாறு காணாத தாக்குதலின் மூலமே இந்தப் போருக்கான நிதி வழங்கப்படுகிறது. ஏப்ரல் 1-ஆம் தேதி வெள்ளை மாளிகையில் நடந்த மதிய விருந்தின் போது, போர்களில் ஈடுபட்டு வருவதால் அரசாங்கத்தால் சமூகப் பாதுகாப்பு, சமூக உதவி மற்றும் இதர சமூக நலத்திட்டங்களுக்கு நிதி வழங்க முடியாது என்று டரம்ப் கூறினார்.

அத்தியாவசியத் நலத் திட்டங்களில் வெட்டுக்கள் மூலம் போருக்கான செலவை ஏற்கும்படி கேட்கப்படும் அதே வர்க்கம்தான், போரில் ஈடுபடவும் அழைக்கப்படுகிறது. 18 முதல் 26 வயது வரையிலான அனைத்து ஆண்களுக்கும் கட்டாய இராணுவச் சேர்க்கை பதிவு, 2026 தேசிய பாதுகாப்பு அங்கீகாரச் சட்டத்தின் ஒரு பகுதியாக ட்ரம்பால் கையெழுத்திடப்பட்டு, 2026 டிசம்பரில் நடைமுறைக்கு வருகிறது. எஃகு ஆலைத் தொழிலாளர்கள், குடோன் பணியாளர்கள், சுரங்கத் தொழிலாளர்கள் மற்றும் புலம்பெயர்ந்த விவசாயத் தொழிலாளர்களின் பிள்ளைகள், அமெரிக்க ஏகாதிபத்தியத்திற்காக சீனாவின் எரிசக்தி விநியோகத்தை கட்டுப்படுத்தும் நோக்கில், நாசகாரி கப்பல்களிலும் பாரசீக வளைகுடாவின் கடற்கரைகளிலும் இறப்பதற்காக அனுப்பப்படுவார்கள்.

போருக்கு எதிரான போராட்டத்தை, சமூக நலத்திட்டங்களின் அழிவு, கட்டாய இராணுவச் சேர்க்கைக்கான உந்துதல் மற்றும் ஒரு இராணுவ-பொலிஸ் சர்வாதிகாரத்தை நிறுவுதல் ஆகியவற்றிற்கு எதிரான போராட்டத்திலிருந்து பிரிக்க முடியாது. வேலைகள், ஊதியங்கள் மற்றும் வாழ்க்கைத் தரத்தைப் பாதுகாப்பதற்கான போராட்டம், ஏகாதிபத்திய போருக்கு எதிராகவும், மற்றும் இந்த சமூகக் கேடுகளுக்கு மூல காரணமான இருக்கும் முதலாளித்துவ அமைப்பு முறைக்கு எதிராகவும் ஐக்கியப்பட வேண்டும்.